Хуссар Ирыстоны президенты хæстæ æххæстгæнæг Хъамболты Марат сæмбæлд, Цæгат Ирыстоны чи цæры, Хуссар Ирыстоны уыцы граждантимæ. Радзырдта, республикæйы разамонæджы бынаты цы 2 мæйы ис, уыцы рæстæгмæ цы скæнын бантыст, уый тыххæй. Загъта риссаг фарстаты æмæ фидæнмæ нысанты тыххæй. Сæйрагдæр фарстатæй иу у экономикæ. Абон Хуссар Ирыстоны ацы къабаз 95 процентæн арæзт у Уæрæсейы Федерацийы хыгъдæй. Хъамболты Марат куыд загъта, афтæмæй хъæуы хи экономикæйы рæзтыл архайын. Радих кодта 2 къабазы – хъæууон хæдзарад æмæ туризм. Йæ ныхæстæм гæсгæ, Хуссар Ирыстон бабæрæг кæнын кæй фæнды, ахæм адæм бирæ ис, фæлæ хъæуы æмбæлгæ уавæртæ скæнын. Ууыл куыст цæуы. Куыд ма загъта, афтæмæй архайынц, цæмæй республикæйæ рацæугæ адæм фæстæмæ сæ райгуырæн зæхмæ æрыздæхой, ууыл. Уымæн уавæртæ аразынц. Мæскуыйы, Санкт-Петербурджы æмæ Омскы уæлдæр ахуыргæнæндæттæ цæттæ сты æмгуыстад кæнынмæ техникон дæсныйæдты специалистты ахуыр кæныны фæдыл. Фехъусын ма кодта, Боллоты Таймураз Къуайсайы кæй байгом кæндзæн хъуымацуафæн фабрикæ.  Хъамболты Марат фæнысан кодта, кæй ис риссаг фарстатæ социалон къабазы. Сæ хыгъды – медицинæ, доны уавæр. Уыдон алыг кæныныл дæр архайд цæуы. Фембæлды архайдта 300 адæймагæй фылдæр. Уыдысты дзы Парламенты минæвæрттæ, Горæтгæрон районы разамынд, æхсæнадон архайджытæ, номдзыд спортсментæ. Хуссар Ирыстоны президенты хæстæ æххæстгæнæгмæ лæвæрдтой фæрстытæ æмæ сын Хъамболты Марат радта бæстон дзуæппытæ.